كلوب الدو

Ehab Wassily

نزلت من كام يوم اشترى جزمتين اسود وبنى كنت محتاجهم لكام طقم لزوم الشغل ونزلت معايا امى واحنا بنلف وندور عدينا على محل Club Aldo المعروف والموجود ليه فروع كتير ومعروف برضة ان اسعاره معقولة فصممت انى ادخل ومعى امى علشان اشترى ليها حاجة وطبعا هى رفضت وقالت المهم ان انا اشترى الحاجات اللى محتاجها الأول لكن انا كمان صممت ودخلنا المحل وبصراحة كان موجود تشكيلة رائعة من الجزم والشباشب وانا مكدبتش خبر وطلبت من البائع كذا موديل من الجزم والشباشب وكان شاب كويس جدا وعنده ذوق عالى فى اختيار البضاعة اللى ممكن يقدمها للزبون بعد معرفة الميول للمشترى وانا اقنعت امى انها تجرب وفضلت اعرض عليها الموديلات المختلفة لحد ما اخترنا اللى اقتنعت بهم وقبل ما نقوم لقيت البائع الناصح احضر ثلاث موديلات شنط يد وطبعا كانت الالون متناسقة مع الجزمة والشبشب اللى اخترناهم وكان سهل اقناع امى بالموافقة ودة من جودة الخامات والخدمة اللى هى معروفة عن محلات Club Aldo ودفعنا ومشينا واحنا مبسوطين.

Riham Mohsen

من رأيى هو من احسن محلات الاحذية والشنط الخاصة بالبنات بشكل خاص وانو بيهتم بفئة عمرية تمثل جزء كبير من البلد وفعلا اسعاره كويسة بالنسبة لمحلات تانية ومنتجاته حلوة جدا واوقات بتكون جريئة فى الوانها بس دة كان اول ما بدأ يفتح يعنى فى اول سنة او حاجة زى كدة دلوقتى كل ماروح عشان اشترى منه حاجة بحس ان الموديلات كلها قديمة ومركونة عندو من فترة وكتير بلاقى مودلات سنين فاتت مش بيغير وبالنسبة لى دى مشكلة لانى اتعودت اشترى منو عشان منتجاته استخدامها معايا ريحنى واشكالها بتعجبنى وستايل وشبابى بس ياريت يكون فى موديلات جديدة لموسم مش معقول اشترى حاجة شايفاها الموسم اللى فات عشان مش فى جديد.