مطعم اسماك ابو قير

Marium Mohamed

اسماك أبو قير من الاسم حتى تحس انك فى اسكندرية بجد. المطعم موجود فى مصر الجديدة والوصول ليه سهل جدا يعنى فى يوم بعد الشغل لو زهقان ومش عارف تأكل فين روح وجربه هيعجبك بجد. لما رحنا هناك طلبنا انواع كتيرة اوى من الاكل علشان كنا كتير بجد يعنى مثلا طلبنا بورى وبلطى مشوى وجمبرى مقلى ومشوى وكمان كابوريا وسبيط. الاكل كان حلو اوى وكمان الكابوريا كانت خرافة وكانت مليانة لحم بجد وكانت احلى مرة كلت فيها كابوريا فى حياتى. اما بقة بالنسبة للسبيط فكان مقرمش من برة وطرى من جوه و مزز كده من اللمون وطعم حلو أوى ومكنش حادق زى ما بيكون دايما فى كل حتة باكله فيها. والسمك كله كان طازج جدا اكنك لسه مطلعه من البحر بجد.

Mohamed Osman

المحل موجود فى تريومف بجانب اولاد رجب، المحل متخصص فى الاسماك عنده جميع انواع السمك اللى ممكن تتخيلها وكله طازج وبيعمل مشوى ومقلى ومشوى زيت وليمون كله، وكمان عنده ساندوتشات جمبرى وسبيط وكفتة جمبرى تحفة وفيليه وكله فرنساوى، الاسعار من 6 او 7 وانت طالع حسب حجم العيش وحجم الجمبرى، بس الجامد عنده ان المحل بيعمل شوربة سى فود مجرمة بجد تسلم ايديهم تقريبا ب 17 جنيه، كمان بيعمل وجبات متنوعة عبارة عن الارز وسلاطة وطحينة وسمك او جمبرى واسعارها مناسبة زى مانت عايز يعنى ممكن تجيب وجبة حلوة جدا فى حدود ال 20 جنيه، العيب الوحيد ان ما فيش قعدة هناك يعنى لو خروجة مش حتعرف تجيب غير الساندوتشات وممكن الشوربة بس بردو لازم يكون معاك عربية يا اما تجيب تيك اواى بقة.

Mohamed Nabil

احسن مطعم اسماك فى مصر الجديدة من وجه نظرى وبالاخص شوربة السى فود وهمية وسعر بسيط مش غالى بس مافيش مكان تقعد تاكل فية ده عيبة يعنى اكلة اصحاب مش اهل بس ممكن دليفرى بس هيجيلك الحاجة برده يلا بالهنا والشفا لازم تجربوا