جمعية رسالة للاعمال الخيرية

Mahmoud Ragab

اسمها على مسمى عشان هي بجد رسالة، صدقها وآمن بيها كل اللي بيشتغلوا في الجمعية المحترمة دي واللي شرفت بالعمل فيها في بداياتها في المركز الرئيسي ده، واتشرفت بمقابلة د/ شريف – رئيس مجلس ادارة الجمعية واللي بجد بيبذل مجهود رائع وجبار عشان يوصل برسالة انها تكون رسالة توصل لكل الناس، ويساهموا في انها تبقى على المستوى اللي هي عليه دلوقتي، واللي بصراحة متأكد انها هتكون اعلى واقوى من كده كمان، عشان ده بيرجع لإيمان ادارتها والشباب العاملين بيها بالرسالة اللي بيقدموها واللي بتتكون من مساعدة المحتاجين في كل المجالات واللي منها: دار لاكفال الايتام – وده كان نشاطها الرئيسي في البداية. مساعدة المكفوفين وذوي الاحتياجات الخاصة. رعاية الصم والبكم. مجموعات التقوية ومحو الامية. تجميع الملابس المستعملة وتنظيفها وكويها وعرضها في معارض خاصة بالدار والعائد بالكامل يرجع للاسر المحتاجة. تجميع شنط رمضان واللي بيوصل عددها لأكتر من مليون شنطة للأسر المحتاجة. ده غير انشطة تانية كتير بتقدمها الدار، واللي نفسي بجد كل واحد فينا يساهم ولو بأي حاجة عشان نساهم في وجود بسمة على وش المحتاجين والفقراء.

Rehab Mohammed

جمعية رسالة من أحسن وأفضل الجمعيات الموجودة فى مصر لعمل الخير طبعا كلنا عارفينها أنا قبل ما أزورها كان كل إللى أعرفه عنها إنها جمعية بتكفل الأيتام، لما زرتها لقيت عشرات الأنشطة فى الجمعية، وأول ما دخلت هناك لقيت شباب ممتازين ومثقفين وفى منتهى الود إستقبلونى بكل ترحاب وأخدوا بياناتى وعرفونى على كل أنشطة الجمعية وقالولى إن فى مفهوم غلط الناس وخداه عن رسالة وهو إن الجمعية محتاجاه التبرعات المادية فقط، لكن قالولى إن الجمعية محتاجة العمل التطوعى أكتر بكتير. وإكتشفت إنى أقدر أعمل حاجات كتير هناك فى رسالة زى دروس التقوية المجانية للأيتام، دروس محو الأميه، المساعدة فى تجهيز العرائس، واحلى نشاط هناك انا عجبنى أوى تسجيل الكتب الدراسية للمكفوفين فى جميع المراحل التعليمية على شرائط كاسيت وسى دى. وأنشطة تانية كتير هناك، والجمعية بتتصل بيا كل فترة علشان تقولى على المشاريع الجديدة اللى عندهم، وعن رحلات للأيتام والمكفوفين وفاقدى السمع علشان لو عايزة أتطوع وأروح معاهم. يا ريت كل الناس تروح وتساعد بوقتها ومجهودها قبل فلوسها.