Misr Public Library

Abdelrahman Gamel

المكتبة دى انا كنت باروحها من وانا صغير ولسة باروح لحد دلوقتى بصراحة حاجة جميلة ومشرفة جدا والحاجة الحلوة انها بتبقى زحمة وده دليل ان لسة فيه ناس مهتمة بالقراءة لحد دلوقتى صحيح ان الثورة الالكترونية الكبيرة اللى حصلت ادت لتراجع الكتب شوية بس ده ما يمنعش ان الكتب لها اهميتها الكبيرة وهما فى المكتبة موفرين اجهز كمبيوتر علشان يواكبوا التطور ويوفروا لرواد المكتبة المعلومات والثقافة عن طريق الحاسبات الالية وهناك هتلاقى كتب فى جميع التخصصات والاتجاهات يعنى مش بس الاطفال هما اللى يروحوا هناك ده الكبار كمان بيروحوا علشان يقراوا كتب فى الثقافة والدين والسياسة والتاريخ وغيرها كتير وانا عن نفسى باحب الادب العالمى وبانصحك تقرا لماركيز او ماكسيم غوركى بس افضل كتب باحب اقراها فى الادب العالمى كتب الخيال العلمى وده فيه عمالقة زى جول فيرن و هيربيرت جورج ويلز بجد لو رحت هناك هتستفيد كتير قوى لانهم كمان بينظموا امسيات ثقافية وبيعملوا مسابقات للموهوبين فى جميع المجالات.

Rehab Mohammed

مكتبة مبارك العامة بالدقى من أحسن المكتبات اللى أنا رحتها فى مصر أعتقد إن فعلا لازم كل الناس بكل الأعمار يروحوا يزوروها لأنهم هيستفيدوا كتير منها، لأنها بتضم جميع أنواع الكتب اللى ممكن الواحد يتخيلها .... هى متقسمة 3 أدوار: الدور الأول فيه قسم الأدب العربى والإنجليزى والمعاجم والقواميس والموسوعات والكتب الطبية وتعليم اللغات وعن السياحة والتاريخ والكمبيوتر والشبكات وكتب تطوير الذات والتنمية البشرية و علم الإجتماع وعشرات الفروع الأخرى بالإضافة إلى غرفة الإنترنت وتقريبا فيها حوالى 10 أجهزة كمبيوتر طبعا متوصلة بالإنترنت، يقدر مشتركى المكتبة حجز ساعة إنترنت على أى جهاز من الاجهزة بجنيه واحد بس... والدور الثانى مخصص للأطفال والشباب وهو فيه قصص وروايات وترجمات لروايات عالمية و والروايات البوليسية والرومانسية المشهورة زى رجل المستحيل، ملف المستقبل، زهور وعبير... وغيرهم كتير. وكمان فى القسم دة فى الكتب الخارجية الدراسية لجميع المراحل التعليمية: إبتدائى وإعدادى وثانوى... أعتقد إن ده يفيد الناس إللى مش قادرة تشترى الكتب الخارجية. والدور الثالث فيه قاعة الندوات والمحاضرات. وكمان بتقدم المكتبة كورسات إنجليزى وكمبيوتر وبتعمل مسابقات فى الرسم والشطرنج وبتستضيف دكاترة وأساتذة فى تخصصات كتير لعمل محاضرات وندوات. كل اللى انا قلته ده نبذة مختصرة عن اللى فى المكتبة دا طبعا مش كل حاجة. لازم فعلا كل الأسرة تروح تزورها وتشترك فيها. وسعر الإشتراك السنوى للمكتبة 25 جنيه بس... ويسمح للمشترك إستعارة 5 كتب لمدة أسبوعين وممكن يجدد أسبوعين تانيين لكن لو أتأخر عن ترجيع الكتب عن المدة المحددة يبتدى يدفع غرامة.. المكتبة كمان فيها كافيتيريا أسعارها رخيصة جدا وكمان فيها حديقة كبيرة وحلوة جدا ممكن الواحد يعد يستمتع بالخضرة فيها. والمكتبة مواصلاتها سهلة جدا لأن اول ما تخرج من المكتبة فى محطة اتوبيس وكمان المكتبة بينها وبين محطة مترو الدقى 10 دقائق مشى للى بيحب يركب مترو.